|
Святому преподобному
Сергию Радонежскому
 Всея России чудотворцу
О, священная
главо, преподобне и Богоносне отче наш Сергие, молитвою твоею, и верою и
любовию, яже к Богу, и чистотою сердца, еще на земле во обитель Пресвятыя
Троицы душу твою устроивай, и ангельского общения и Пресвятыя Богородицы
посещения сподобивыйся, и дар чудодественныя благодати приемый, по
отшествии же твоем от земных наипаче к Богу приближивыйся, и небесныя силы
приобщивыйся, но и от нас духом любве твоея не отступай, и честныя твои
мощи, яко сосуд благодати полный и преизливающийся, нам оставляй! Велие
имея дерзновение ко Всемилостливому Владыце, моли спасти рабы Его, сущей в
тебе благодати Его верующая и к тебе любовию притекающия. Испроси нам от
Великодаровитого Бога нашего всякий дар, всем и коемуждо благопотребен:
веры непорочны соблюдение, градов наших утверждение, мира умирение, от
глада и пагубы избавление, от нашествия иноплеменных сохранение, скорбящим
утешение, недугующим исцеление, падшим возставление, заблуждающим на путь
истины и спасения возвращение, подвизающимся укрепление, благоделающим в
делах благих преуспевание и благословение, младенцам воспитание, юным
наставление, неверующим вразумление, сиротам и вдовицам заступление,
отходящим от сего временного жития к вечному благое уготовление и
напутствие, отшедшим благое упокоение, и вся ны спосшедствующими твоими
молитвами сподоби в день страшного суда шуия части избавитися, десныя же
страны общники быти и блаженный оный глас Владыки Христа услышати: «Приидите,
благословеннии Отца Моего, наследуйте уготованное вам Царствие от сложения
мира». Аминь.
|
